阿根廷甲組聯賽次循環來到尾聲，部分球隊仍備受降班威脅，小阿根廷人就係其中一支，球隊現時於近三季平均分積分榜位列尾四。由於阿甲今年「改制」，近三季平均分積分榜最尾三隊會直接降班，所以排尾四的小阿根廷人現時仍未安枕，球隊今仗於主場面對一早上岸嘅高隆，相信可贏波全取三分，捧主Ｗ。 

（周日凌晨2時10分開賽）

小阿根廷人於次循環表現實在令人慘不忍睹，球隊只係贏過兩場，結果於近三季平均分積分榜一直下滑，最終跌到現時尾四位置，僅領先尾三的聖馬田聖祖安0.007分，如果再有任何差池，來季隨時要降落乙組角逐。俗語有話「唔見棺材唔流眼淚」，小阿根廷人近三仗聯賽取得一勝兩和，狀態明顯復甦，當中更曾擊敗前列爭標分子河床，可見球隊實力並非想像中咁差。而且，小阿根廷人今季贏波的兩場全屬主場賽事，球隊今仗續於地頭出戰，有力交出好成績。 

高隆次循環戰績同樣反反覆覆，既可連贏幾場又可連輸數仗，球隊全賴過去兩季積存甚多分數，現時才可於近三季平均分積分榜排中游位置，不用受降班威脅。事實上，高隆球員近仗似乎有等放假現象，球隊前仗作客篤定降班的聖達菲聯，竟然都要輸波，今仗作客更要面對全力搶分護級的小阿根廷人，一眾球員相信唔會阻人發達，今仗一於捧小阿根廷人贏波。