世界盃外圍賽非洲區Ｊ組形勢緊湊，榜首同榜尾之間只有兩分差距，故未來兩輪賽事對躋身第三圈可謂極為關鍵。其中暫時排行第二名球隊烏干達將於主場對安哥拉。雙方實力相當接近，相信今場比賽唔容易分出勝負。烏干達讓波有暗湧，「讓球客勝」好路。

（周六晚9時開賽）

留意到Ｊ組有個特別情況，經過四輪比賽之後冇一支球隊能夠取多過一場勝利，由此可知實力有幾接近。大膽講句，此組根本冇一支球隊有本事向對手讓波。就好似主隊烏干達，只曾以一球小勝實力稍遜嘅利比里亞，此戰參考價值唔算高，今次對住安哥拉冇咁好彩。安哥拉於分組賽未開勝門確係事實，不過四場分組賽全部打和，兩鬥榜首塞內加爾都執到一分，計賽績唔會比主隊差，今仗受讓必捧「讓球客勝」。

D組贊比亞主場對蘇丹，「讓球主勝」開出機會高。贊比亞現時正與加納爭緊晉級席位，今場絕對唔能夠放軟手腳。贊比亞球員任勞任怨，故得到唔少歐洲球隊賞識。比如進攻球員馬約卡就去咗英超修咸頓，梅倫加更成為荷甲烏德勒支嘅首席射手。球員外流有助提升國家隊水平，面對蘇丹可望順利勝出。查實蘇丹已經無緣晉級，鬥志不足兼實力有限，今場隨時被贊比亞大炒。