洲際盃A組墨西哥對意大利，去年歐國盃亞軍意大利一班球星經過一季搏殺後，近期疲態畢露，反觀墨西哥以倫奧金牌人腳為骨幹，默契及活力兼備，加上「半個主場」之利，迎擊疲兵意大利坐和望贏，受讓平半，撐墨西哥下盤。

（無綫翡翠台及明珠台周一凌晨3時直播）

意大利連續兩屆參賽，但佢哋對呢項賽事唔太重視，上屆演出慘不忍睹，分組賽就出局。今屆似有歷史重演味道，全隊備戰態度及精神面貌麻麻，早前世界盃外圍賽對捷克被對手壓住來攻，跟住熱身賽被魚腩球隊海地逼和，表現毫無鬥心，似乎等放暑假。

意軍最大隱憂係一對前鋒巴洛迪利及艾沙拉維分別受傷患及缺態困擾，「巴神」拉傷右腿，雖然情況唔算嚴重，但頂硬上或影響發揮。艾沙拉維陷入入球荒，已有近4個月時間未曾於正式賽事入波，領隊柏蘭迪利都計劃收起佢，改踢4321單前鋒陣式，但依家「巴神」有傷，打亂部署，柏帥都幾頭痕。

墨西哥大軍有多名去年年倫奧金牌球員壓陣，加入埋曼聯前鋒「小豌豆」查維亞靴南迪斯，陣容更勁。雖然墨軍今年9戰僅1勝，但其餘8仗全部不敗，其中6場不失波，可見韌力十足。

由於墨西哥一向被視為二線球隊，特別渴望喺大賽爭取佳績，證明自己，爭標鬥心強，加上喺鄰國巴西舉行，可以話佔半個主場之利，贏埋都唔奇。