周一早上洲際國家盃重頭戲為西班牙對烏拉圭，今次西班牙領隊迪保斯基帶咗4名前鋒去巴西，包括韋拿、費蘭度托利斯、柏度洛迪古斯同蘇爾達杜。由今次點兵手法可以推測得到，西班牙應該會派前鋒落場，唔會好似歐洲國家盃咁打「冇鋒陣」。

西班牙明年就喺巴西進行世盃衞冕戰，球隊有必要借助今屆洲際盃進行測試，為未來比賽制訂一套作戰藍本。領隊迪保斯基係聰明人，明白一支具競爭力嘅國家隊需要全面發展，因此西班牙一定會測試邊位前鋒最適合現時西班牙陣式或打法。更要留意今場對手係有一定實力嘅烏拉圭，相信測試效果會更具參考價值。

較早時間舉行為墨西哥對意大利，相信好多人都諗起前鋒巴洛迪利。究竟呢位意大利前鋒係「扶手棍」定係「攞命藤」，連佢自己都答你唔到。墨西哥係中美洲球隊，去到南美比賽有半個主場之利，查實墨西哥都有料到，有幾名國腳都喺西甲搵食，同意大利應該有得鍊。Peter覺得呢場係「五五波」，打和機會相當之高。