假巴西舉行洲際國家盃今晚深夜上演獨腳戲，B組賽事非洲勁旅「超霸鷹」尼日利亞強勢撲擊大洋洲代表大溪地。雖然出征前尼軍與足總因獎金問題幾乎搞到罷踢，但在國際足協介入下終告解決，依家可以專心踢波，面對由一班業餘球員組成嘅大溪地，質素贏足幾條街喇，「讓球主客和」尼軍讓到二球都冇有怕，強捧「讓球客勝」。

（無綫翡翠台、明珠台及高清翡翠台周二凌晨3時直播）

球員最怕有汗出冇糧出，之前尼日利亞不滿該國足總剋扣比賽獎金，差啲玩罷踢，好彩經過國際足協官員努力斡旋，雙方終於達成協議，避免國家於世界舞台前出醜，成班即刻醒神晒。作為傳統非洲勁旅，「超霸鷹」曾一度跌入谷底，幸好年頭重奪非國盃，猶如打咗一支強心針，為球隊迎來復甦嘅勢頭，事實上尼日利亞擺脫以往忽視防守嘅問題，喺車路士中場約翰米基爾漸趨成熟嘅領導下，變得愈來愈攻守平衡。

雖然今屆尼日利亞冇徵召域陀摩西斯、奧丹維治、馬田斯、尤保等外流球星，星味略嫌不足，但仍有車仔雙星約翰米基爾及奧美路壓陣，領隊基舒希望減少個人主義色彩，打造一支注重整體戰嘅「超霸鷹」。

大溪地能以大洋洲冠軍身份殺入洲際國家盃已經夠晒驚喜，睇番該隊大軍名單，除咗外流射手華希路亞，其餘均喺本土搵食，甚至有份正職喺身，係一支正宗業餘波，今次有幸參賽同高手切磋已開心到癲，唔好奢望佢哋可爆冷贏波。「讓球主客和」開到讓兩球咁辣，證明尼日利亞大勝可期，預計「超霸鷹」可藉住對弱旅練兵兼騷下哥利，「讓球客勝」咪錯過。