以前講起大洋洲冠軍多不離澳洲（編按：未轉亞洲賽區前）或新西蘭，今次洲際國家盃卻殺出一支大溪地。呢個人口只得十幾萬嘅南太平洋島嶼，世界排名仲高過香港（138對147），既然可以力壓新西蘭贏得大洋洲區冠軍，相信並非浪得虛名。眼見呢個小國咁爭氣，另一邊廂嘅國家足球隊卻喺熱身賽恥辱性地慘敗畀泰國，令Peter倍添唏噓。Peter有份旁述早前中國對荷蘭嘅熱身賽，嗰場比賽中國隊踢得唔錯，估唔到事隔幾日表現完全走晒樣，再諗番香港隊早前於熱身賽主場不敵菲律賓，更感到中港兩地足球發展寸步難行，只得搖頭苦笑。 

尼日利亞出戰洲際國家盃前鬧出獎金風波，原來佢哋贏波獎金比起日之泉JC晨曦成功護級嘅獎金仲要低，難怪球員咁唔高興，不過咁樣可能反而激起球員嘅鬥心，因為陣中大部分球員都想透過今次大賽打開通往歐洲大球會之路，故此無論為國為己，球員落場一定拚盡，相信非洲鷹可以至少淨勝兩粒打開勝利之門。

講番首場比賽，東道主巴西以三比○大破日本，表現從容不迫，尼馬開賽不久射入世界波係勝負關鍵，日本部分外流球員經過整季拚搏，踢至下半場末段已成強弩之末，落得大敗亦無話可說。巴西九四年憑着穩健防守贏得世界盃冠軍，「大菲」史高拉利搵咗當年領隊彭利拿做副手，絕對係明智之舉，不過能否捧盃暫時仍言之尚早。Peter認為兩名前鋒尼馬、侯克目前於巴西嘅「433」陣式企得太前，中場控球力不足，一旦遇上實力較強嘅西班牙或意大利將會好麻煩。就算巴西能於洲際國家盃取得好成績，但在未來十一個月內如果未能搵到可以刺激球隊嘅「X-Factor」，巴西嘅世界盃前景一啲都唔樂觀。