世界盃外圍賽亞洲區打到最後一輪分組賽，A、B組頭兩名可奪得決賽周入場券，兩組第三名會進行附加賽，勝方將同南美洲區第五名爭最後一席。現時只得B組一哥日本提前取得入場券，今輪四戰同屬關鍵對決，名牌球隊澳洲贏波就可鐵定晉級，而南韓和波就能進軍巴西，為圓世盃夢，隊隊都會爭餐死！

世界盃外圍賽亞洲區Ｂ組最後一輪分組賽，澳洲主場迎戰伊拉克，澳洲呢班老將去到關鍵時刻發揮到作用，今戰只要贏埋就可取得世界盃決賽周入場券，目標明確。伊拉克已提前出局，今戰屬例行公事，只用作世青盃練兵之用，戰意輸晒，一於捧「讓球主勝」！

（now 671及672周二下午5時30分直播） 

澳洲青黃不接屬不爭事實，主將尼爾、卡希爾及比斯安奴全部處於職業生涯黃昏期，活力不足。不過，呢班老波骨勝在有經驗，去到關鍵戰役交足貨，大軍對上兩戰先和日本，再炒約旦，兩場波同樣打出超水準。隊長尼爾暫未有班落，但踢落冇退步，佢賽前提醒隊友世盃入場券仲未到手，絕對唔可以鬆懈！隊內將士級數始終較高，集中精神就能發揮應有水準，贏面好高。

另一邊廂伊拉克上次鬥日本搏盡輸波，已經無緣打入世界盃，士氣大受打擊。現時伊拉克陣內有唔少新星在陣，17歲中場塔利克及19歲前鋒鴨都拉希姆同樣極具潛力，兩人稍後同樣會出戰世青盃，呢場例行公事正好畀佢哋適應大戰氣氛。不過，澳洲班沙場老將今戰必定如狼似虎搶攻，呢班足球「小將」好難頂得住，隨時大敗收場。睇番賠率主勝冇肉食，捧「讓球主勝」！

同組另一戰約旦主場對阿曼，約旦曾於主場贏過日本同澳洲，賽績冇得彈，佢哋目前落後次席澳洲三分，球差卻輸一條街，難望直接出線，最實際都係今場砌低阿曼以第三名身份參戰附加賽。不過，約旦上場大敗輸得難睇，現時士氣麻麻，讓波靠唔住，要「讓球客勝」。

（now 671周三凌晨零時直播）