A組另一場意大利對日本，其中一個焦點會落喺兩位意籍教頭、意大利領隊柏蘭迪利及日本領隊沙哲朗尼嘅正面對決。論調兵遣將能力，柏蘭迪利一定在沙哲朗尼之上，相信意大利可以喺洲際國家盃再下一城，主W要捧。

（無綫高清翡翠台及明珠台周四早上6時直播）

意大利踢大賽一向慢熱，但自從柏蘭迪利接手之後，整隊變得積極起來，上場對墨西哥，意大利全場主動壓住對手搶攻，逼到墨西哥後防連番犯錯，相信意大利會繼續採用高壓迫性打法，再次迫使日本後防出現漏洞。基於意大利喺分組賽最後一場要對同組實力較強對手巴西，相信佢哋會把握今場機會盡攞三分。人腳方面，之前受傷嘅前鋒艾沙拉維已經冇事，最近仲跟大軍到沙灘打排球，今場有機會同老友巴洛迪利合作攻堅。

日本喺沙哲朗尼帶領下，演出唔算太標青，上仗面對巴西更輸夠三粒。日本重奪亞洲盃後曾豪言要奪取世界盃冠軍，上星期佢哋就畀巴西媒體諷刺足球水平同國家經濟發展成反比，爭世界盃冠軍只係笑話。再講，日本領隊沙哲朗尼喺意甲只係普通料，數數佢近十二年執教過嘅拉素、國米、拖連奴、祖雲達斯，全部都係一年貨仔就被炒，呢個「二打六」統帥根本冇能力大幅提升日本水平，今場對意大利可謂凶多吉少。