洲際盃踢完首輪分組賽，幾支熱門巴西、西班牙、意大利順利打響頭炮。東道主巴西首仗表現獲一致好評，但論個人質素始終唔及西班牙，如果想捧盃好視乎「狂牛國」嘅戰意有幾高。巴西領隊「大菲」史高拉利自知目前人腳並非最好，故此唔再執迷以往嘅華麗踢法，反而由防線做起，搵來九四世盃冠軍教頭彭利拿做軍師，改善防守先求不失，取向值得一讚。

西班牙則棄用「冇鋒陣」，用蘇爾達杜任單箭頭、柏度洛迪古斯作輔鋒，兩人實力一直被低估，今次被委以重任有望踢出身價。睇埋佢哋後備席上仲有Peter心目中世界三大最佳防守中場之一嘅查維馬天尼斯、桑馬達、大衞施華等，板櫈深度令人咋舌，如果可以保持爭盃決心，依然係捧盃頂頭大熱。

當然亦不得不提意大利，佢哋場上表現可能唔及巴西、西班牙搶眼，但對手想要贏佢哋亦唔容易，只要巴洛迪利專心踢好波，捧盃機會絕不下於上述兩強。

講番A組次輪，Peter其實唔想巴西、意大利齊齊贏波，以免最後一輪兩軍碰頭成為雞肋。頭先講過巴西今屆注重防守，遇上攻力未算突出嘅墨西哥，估計入波唔多，個人睇好巴西可以小勝而回。