今晚有五場挪威盃16強賽事上演，其中挪甲球隊波杜基林特於主場迎戰挪超球隊奧特格寧蘭。波杜基林特現於挪甲排榜首，今季聯賽連盃賽主場錄得全勝。對手奧特格寧蘭則相反，今季除兩場盃賽作客低組別球隊贏波外，聯賽客場賽事錄得全敗，今仗相信難有作為，捧主隊贏波。

（周四凌晨零時開賽）

波杜基林特今季於挪甲表現可人，暫時排於榜首位置，更厲害的是球隊主場戰績非常強勁，聯賽連盃賽9場賽事錄得全勝佳續，可見係一支完全靠主場搵食的球隊。波杜基林特主要倚賴兩位射手攻堅，分別係拉積比及占祖漢臣，兩人今季已合共為球隊攻入14球，今仗勢必成為波杜基林特爭勝的重要角色。

奧特格寧蘭現於挪超排第14位，球隊最大問題係客場表現不濟，聯賽5場作客賽事全敗之餘只入得1球，可見攻力非常差勁。奧特格寧蘭於較早前的兩場挪威盃賽事作客雖贏波，但對手只是低組別球隊，而且對樸斯格寧蘭一仗更要打到加時先贏到，今仗更要造訪主場全勝的波杜基林特，相信難以取得突破。