今晚洲際國家盃西班牙對大溪地，兩隊實力懸殊，但唔好太質疑大溪地嘅質素，畢竟佢哋的確係力壓新西蘭等球隊，成為大洋洲冠軍，屬於貨真價實。無可否認，西班牙今仗無論派邊十一位球員擔任正選都可以贏波，問題係贏幾多球，以及有冇人可以重演尼日利亞前鋒奧度亞馬迪轟入大溪地三球嘅好戲。

另一場尼日利亞對烏拉圭，形勢緊湊好多，屬於名副其實嘅生死戰，烏拉圭擁有蘇亞雷斯、科蘭等球星，分量十足，上仗僅負實力強勁嘅西班牙，其實情有可原，今仗鬥「超霸鷹」係時候打出身價波。至於尼日利亞都有車路士中場約翰米基爾等猛將助陣，但最值得留意係年僅20歲嘅7號仔阿密特穆沙，呢位前鋒靈活、快速、滿場飛，如果繼續有好表現，Peter相信好快有大球會向莫斯科中央陸軍提出收購。

講到可觀性，尾場尼日利亞對烏拉圭相對較有睇頭，建議大家可以早啲起身睇呢場直播，然後先至重溫頭場西班牙對大溪地嘅賽事精華，享受一個詩意嘅夏日朝早。