U21歐國盃剛圓滿結束，另一個球星搖籃世青盃今晚緊接在土耳其拉開戰幔，奪標次數最多嘅阿根廷、巴西無緣今屆決賽周，近年橫掃球壇嘅西班牙自然被捧為奪標大熱門，但佢哋身處死亡A組，同組有超新星保羅普巴壓陣嘅法國及○九年冠軍加納，爭出線要施展渾身解數！

A組首輪分組賽，法國U20火併加納U20。法國U20主力保羅普巴、烏迪迪等在歐洲大球會已嶄露頭角，不過「黑星」加納過去五次參加世青盃未試過喺分組賽輸波，佢哋嘅體力型踢法令唔少歐洲隊吃盡苦頭，法國有被過分唱熱之嫌，加納有力保不敗，波童捧「讓球客勝」。

（TVB網絡電視02頻道及now 810周五晚11時直播）

今屆世青盃六支歐洲隊係透過去年U19歐國盃決賽周成績而取得參賽資格，大部分球隊都以當時主力為班底，法國上年喺U19歐國盃四強僅以互射十二碼不敵最後冠軍西班牙，以此推論，今次被捧為僅次於鬥牛國嘅奪標次熱非常合理。法國大軍名單最具名氣肯定係祖雲達斯中場保羅普巴，呢名外形酷似巴洛迪利嘅天才球員無疑係好波，不過最慘佢連性格、脾氣都十足「巴神」咁款，隨時失驚無神整啲古怪嘢，搵佢領軍實在唔多靠得住。

加納過去五次出線世青盃決賽周未試過喺分組賽輸波，全部都能出線，有四次打入四強、三次入決賽、並在○九年贏得冠軍，足證青訓工作做得唔錯。加納球員體力雄渾、踢法機動，往往可以剋制歐洲隊，從佢哋對上三次參賽從未喺法定時間內輸過畀歐洲球隊可見一斑，法國主W1.67倍唔合理，寧捧「讓球客勝」。

日前西班牙U21先蟬聯歐國盃，今晚輪到小師弟登場，佢哋喺A組首輪硬撼美國U20，以上年勇奪U19歐國盃嘅冠軍班底應戰，實力超晒班，有力擊敗「小花旗」打響頭炮，「讓球客勝」有計。

（TVB網絡電視01頻道及now 801周六凌晨2時直播）

「狂牛」能夠喺各級別賽事交出成績，係因為從小就好注重個人技術嘅培訓，因此與同齡小將相比，真係鶴立雞群。好似中場新星蘇索，上季季初已經被提拔升上利物浦一隊，表現唔曳，同上年喺U19歐國盃封王嘅隊友謝斯洛迪古斯、迪路菲奧等夾慣夾熟，相反美國U20有主力比積夫、柏克活特及約翰布魯克斯未有歸隊，此消彼長之下，「幼狂牛」可望予取予攜，「讓球客勝」捧得過。