洲際國家盃A組最後一輪，東道主巴西迎戰意大利本屬重頭戲，因雙方提早取得出線資格令戲碼有所褪色。兩隊為咗準備淘汰賽階段，相信會作出輪換，讓部分主將休息。不過着得起國家隊球衣都非泛泛之輩，一眾後備邊緣國腳正好趁機爭取表現，增加站穩國家隊位置嘅機會，爭取參與明年世界盃決賽周。佢哋落場一定使出渾身解數顯功架，隨時比常規正選人腳更搏命。加上雙方今屆大踢進攻足球，簡單要入球大。

（無綫翡翠台及高清翡翠台周日凌晨3時直播）

巴西兩戰兩勝，轟入五球兼冇失波，表現無懈可擊，「新比利」尼馬固然係主要功臣，但唔好忽略一班綠葉球員嘅貢獻，特別係祖奧嘅演出最令人驚喜。呢位明尼路前鋒兩仗後備上陣都有波入，佢之所以咁落力，皆因自己並非「森巴兵團」常客，今屆都係由於李安度達美奧受傷退隊，先至獲補選，機會難得，要交出超水準表現，才有望博取領隊「大菲」史高拉利歡心。估計「大菲」今仗會輪換前鋒，祖奧好可能擔正，盡力數胡。

「森巴兵團」中前場人才濟濟，靴蘭尼斯、盧卡斯洛迪古斯等後備攻擊球員一樣有料到，要入波唔成問題。不過中堅大衞雷斯上仗受傷，應該無緣披甲，估計會由拜仁慕尼黑守將丹迪填補佢嘅位置，難免影響防線穩定性，未必可以保持清白之身。巴西和波都可以取得小組首名，但身為東道主，冇理由求和咁衰仔，一樣照攻爭勝。

意大利由柏蘭迪利執教後，已完全摒除傳統主守風格，放膽踢悅目足球，今屆兩仗入六球失四球，上仗同日本炮製七個入球夠晒經典。基奧雲高終於取得首個國家隊入球，對呢位天才球員有好大鼓舞作用，亦為意軍增添一把利器，佢今場可望擔正攻堅，就算派路因傷倦勤，但殺傷力一樣大。意軍現時一批後衞唔可靠，防守中場迪羅斯今仗停賽，令後防更加牙煙，好大機會同巴西合演入球騷。