日乙神奇球隊長崎成功丸傳出喜訊，隊中新西蘭球員米高占士成功取得日籍，仲改埋名叫舞行龍占士，同一眾本土球員親上加親，隊內氣氛一流，今次作客挑戰勁旅神戶勝利船可保不敗，可博「讓球客勝」！

(周六下午5時開賽)

米高占士生於新西蘭，05年去咗東京成立學園留學，已於日本生活8年，佢早前申請入籍日本，日前得到相關部門開綠燈，登錄名叫舞行龍占士。佢話成功取得日籍好開心，特別感謝球迷支持，將會全力回饋日本足球。舞行龍占士適應日乙賽事後表現唔錯，依家同班戰友打成一片，呢點正正係長崎成功丸長期成功之道。

神戶勝利船星味滿瀉，會方仲嫌班波唔夠勁，計劃引入死敵大阪飛腳射手李安度蒙迪拉，後者現時仍然係卡塔爾球會艾薩德嘅球員，佢決定於月尾借用合約屆滿後離開飛腳，勝利船睇準機會出手撬人。不過，勝利船近況奇差，對上4戰僅贏1場，喺主場對住弱旅鳥取飛翔都要輸，表現認真唔掂，今戰讓唔起對手。