今晚世青盃E組揭開戰幔，智利U20將會出戰埃及U20。與經常雷聲大雨點小嘅同組對手英格蘭U20相比，智利U20喺實力上更勝一籌，上季被曼聯外借到韋根磨練嘅前鋒安祖路軒歷基斯，必趁今次大賽騷吓哥利，面對質素麻麻嘅埃及U20可開個靚頭，1.74倍熱W咪走寶。

（TVB網絡電視01頻道及now 801周日晚11時直播）

南美波一向技術細膩，以短傳入滲為主，智利U20亦唔例外，陣中最為人熟悉嘅，梗係上季加盟曼聯嘅安祖路軒歷基斯喇，呢位19歲前鋒非常早熟，擅搶點速度快，埋門把握力強，踢法有啲似前智利球星森莫蘭奴，充滿射手嘅觸覺，佢唔單止係U20嘅大阿哥，甚至已經晉升為大國腳，由於上季被外借到韋根冇乜出場機會，安祖路軒歷基斯若想爭取留番喺曼聯正式做「紅魔仔」，今屆世青盃就係最佳表現舞台，以其天賦只要交足貨，一定會博到愛用小將嘅曼聯新帥莫耶斯關注。

除咗超新星安祖路軒歷基斯之外，呢支智利U20以國內強隊智利大學及高路高路為骨幹，大家夾慣夾熟，默契唔使懷疑，佢哋喺熱身賽贏過烏拉圭U20，更作客以4比4逼和勁旅西班牙U20，能喺「小狂牛」身上省四粒，其進攻火力唔講得笑。相反，埃及U20於非洲區就也文也武，之前喺熱身賽不敵實力平平嘅黑山U21，難登大雅之堂，面對如狼似虎嘅智軍隨時腳軟，主W有1.74倍唔好嫌少呀。