日本聯賽盃八強戰今日展開，大阪櫻花首回合主場迎戰浦和紅鑽，適逢日本歷史重要戰役「大坂之役」四百周年紀念將至，櫻花將帥大熱天時着晒盔甲做騷，豪言要扭轉歷史，代表西軍砌低東軍浦和紅鑽，咁辛苦搞完場大龍鳳當然唔可以衰，主場受讓着數，要「讓球主勝」！

（周日晚6時開賽）

推介之前講吓歷史，「大坂之役」由1614年11月打到1615年5月，呢場係日本戰國時期最終戰役，戰事主要範圍係喺大坂城附近，最終由德川家康帶領嘅東軍消滅豐臣家。大坂即今日嘅大阪，由於「坂」字拆開係「士反」，有武士造反之意，所以喺明治維新時改為「大阪」，一直沿用至今。「大坂之役」四百周年紀念就快來臨，大阪櫻花早排搞紀念活動，主帥古爾比同王牌球星柿谷曜一朗等人以武士Look示人，打正旗號要逆轉歷史，矢志喺聯賽盃以西軍之名殺敗東軍嘅浦和紅鑽。

活動當日天氣勁熱，櫻花班球員着住套嘢都幾攞命，連古爾比都陪班友癲，足見佢哋決心好大。

浦和紅鑽今季殺聲震天，喺聯賽同盃賽都被視為爭標熱門，今次作客都要讓波，盤口非常硬淨。不過，櫻花今季喺自己地頭演出特佳，聯賽連盃賽主場十戰僅一敗，結合埋佢哋近四次對住紅鑽未嘗一敗嘅靚績，受讓又真係幾抵玩噃！