周二凌晨有多場瑞典超舉行，其中一場前列對決馬模主場對艾夫斯堡。馬模聯賽兩連勝，齋睇近績當然唔差，但考慮到所擊敗嘅對手實力有限，今次遇同級球隊艾夫斯堡未必會咁易食，馬模讓波有暗湧，「讓球客勝」較可取。

（周二凌晨1時05分開賽）

馬模近兩場聯賽先後擊敗布洛馬波卡納以及西里安斯卡，不過兩者同屬積分榜下游球隊，馬模贏波其實好正路，唔能夠完全反映出球隊處於極佳狀態。再講，上月尾馬模曾經喺主場面對另一支前列球隊希爾星堡，結果輸波跌晒三分，所以話今場對住爭標分子之一嘅艾夫斯堡，馬模根本冇十足贏波把握。

艾夫斯堡今季表現良好，聯賽作客不敗率高達八成三，數據強勁，今場可以喺馬模身上搶分絕對唔出奇，受讓必捧「讓球客勝」。

另一場較早時間舉行嘅奧斯達主場對諾高平，主Ｗ值得捧場。留意到諾高平近期賽程幾密，球員體力未必可及時回氣。奧斯達雖非大勇，但憑主場之利及較充裕嘅休息時間，今場勝算相當高。

（周二凌晨1時開賽）