世青盃A組次輪賽事，西班牙Ｕ20硬撼加納Ｕ20，前者延續師兄們嘅旺勢，首仗大勝美國Ｕ20極有霸氣，「皇巴」射手謝斯洛迪古斯及迪路菲奧雙劍合璧如魚得水，橫衝直撞勒都勒唔住，相信「小黑星」難當西軍剋星，直取「讓球主勝」。

（ＴＶＢ網絡電視01頻道及now 801周二凌晨2時直播）

其實巴塞小將迪路菲奧薄有名氣，由於佢喺B隊士哥頻頻，上季被主帥維蘭路華提升到A隊，並完成西甲處子戰，迪路菲奧經常以快速突破撕開對方防線，甚有美斯初出道時嘅影子，難怪巴塞急急同佢續約。至於皇馬青訓產品謝斯洛迪古斯，係「小狂牛」喺上年Ｕ19歐國盃封王嘅大功臣，個人獨建五功擸埋金靴，佢擅於搶點把握力強，係一名典型於禁區內搵食嘅中鋒。上仗以4比1大炒美國Ｕ20，兩人各自梅開二度，而謝斯洛迪古斯先開紀錄嘅一球，正係來自迪路菲奧嘅助攻，表現相得益彰，威力驚人。

至於加納Ｕ20方面，佢哋之前四次參加世青盃決賽周，至少殺入八強，但呢支「小黑星」首仗完全畀法國Ｕ20牽住鼻子走，實力明顯未夠火候，面對實力更強嘅「小狂牛」難以樂觀，「讓球主勝」值得優先捧場。