世青盃繼續上演C及D組賽事，主辦國土耳其U20於C組第二輪分組賽主場對哥倫比亞U20。東道主首戰3比0輕取薩爾瓦多，球員質素的確唔差，相信主場出擊可再下一城，哥倫比亞近兩場演出令人失望，今場可捧主Ｗ。

（TVB網絡電視01頻道及now 801周三凌晨2時直播）

土耳其首仗勝取薩爾瓦多，基於對手實力較弱，土耳其未受考驗，相信小國腳仍有足夠體力應付今場比賽。相反哥倫比亞頭場對澳洲就吃力得多，事關當日澳洲喺下半場開波僅一分鐘就取得領先優勢，迫使哥倫比亞要傾力反撲先至追和。好多球迷都知道南美球員訓練方式與歐陸球隊好唔同，佢哋唔會太專注喺體能鍛煉，擔心哥倫比亞班後生仔未必頂到第二鋪。

D組有馬里U20對希臘U20，希臘踢法獨沽一味，無論大小國腳都係以穩守為主，對方唔入波就輪到佢哋打突擊。預料今場會係大悶戰，入球唔會多，細盤捧得過。

（TVB網絡電視02頻道及now 810周三凌晨2時直播）