洲際國家盃周四凌晨爆發4強大戰，東道主巴西和烏拉圭合演南美打吡，由於巴西人民對於政府今次勞民傷財主辦洲際盃極為反感，搞到全國各大城市處處都是街頭示威，而身處體育與政治夾縫當中嘅巴西國家隊，目前唯一可做的就是奪取冠軍，希望以獎盃來平息民怨。可幸新球王尼馬連續3場有靚士哥，球隊上場贏意大利又踢出王者風範；反觀烏拉圭陣中大牌球星又不斷受個人轉會問題困擾，氣勢上未踢先輸，波童信森巴兵可以贏波入決賽，捧晒「主W」及「半場主勝」。

（無綫翡翠台、明珠台及高清翡翠台周四凌晨3時直播）

除咗國內嘅政治因素同反政府浪潮，巴西於出戰洲際國家盃前，其國際足協世界排名跌至第22位，創史上新低，雖然呢點同佢哋唔使踢世盃外圍賽，少了搶分機會有關，但作為堂堂足球王國，世盃5冠王，咁低排名實在唔可以接受。因此既然洲際盃屬國際足協A級賽事，正好作為巴西重振雄風兼爭取排名積分嘅大好機會。

在主場球迷支持下，巴西分組賽演出一場比一場好，頭兩輪對日本、墨西哥保持不失做好防守，上場鬥意大利就展現強大攻力，表現攻守兼備，最令球迷欣慰嘅係早前被指名不副實嘅尼馬終於嚟料，連續3場射入金球兼當選ＭＶＰ，展現球王風範，連帶費特、祖奧等綠葉都大放異彩，全隊信心、狀態皆處巔峰，大有遇神殺神、遇佛殺佛之勢，相信巴西繼續踢出漂亮勝仗，將有助減低國民的怨氣。

烏拉圭能夠取得B組次名出線，某程度上係同組對手實力太弱，唔計西班牙，大溪地只係業餘水準，就算尼日利亞一仗亦唔算贏得好有說服力，根本未受考驗。雖然領隊泰巴尼斯上仗收起多名正選留力踢今場，但蘇亞雷斯、卡雲尼及科蘭呢個前線「三叉戟」組合始終擦唔出火花，而且蘇亞雷斯經過上季尾停賽後，無論身形、狀態都未操番起，加上佢同卡雲尼近日就個人轉會問題先後發言，畀人感覺重視自己多於國家隊，戰意上亦遠遜主隊。

巴西對上3場勝仗都可以領先上半場，如果嫌主W賠率太熱，可以捧埋「半場主勝」及半全場「主主」。