世青盃最後一輪分組賽，A組西班牙U20火併法國U20。西班牙兩連勝已篤定晉級，今場和波便可穩奪小組首名，相信會沿用一貫控球在腳踢法慢慢「搓」，預計入波唔會多，細盤玩得過。

（TVB網絡電視01頻道及now 801周五凌晨1時直播）

兩軍今屆參賽球員主要為上年U19歐國盃班底，當時雙方於四強交手踢至加時打和3比3，西班牙最後僅憑互射12碼淘汰法國，足證實力非常接近。熟悉西班牙嘅球迷都知道，呢班波無論贏輸都係鍾意「搓搓吓」，上場小勝加納就係典型例子，佢哋今場只要和波便可穩奪首名資格，更加大條道理歎慢板。

法國上場臨尾香被美國逼和1比1，想奪首名今場一定要贏波，不過佢哋目前領先第三位嘅美國3分，如果和波亦肯定能以次名出線，形勢上亦唔使過分搶攻，捧細盤最啱數。

同組另一場加納U20鬥美國U20，兩軍踢完兩輪分組賽仲未打開勝利之門，但基於小組第三名都有機會進身16強，相信大家都唔會有咩保留，一於捧入球大。

（TVB網絡電視02頻道及now 810周五凌晨1時直播）