歌神許冠傑嘅名曲《浪子心聲》有句歌詞：「難分真與假」，明早上演洲際國家盃終極決賽巴西對西班牙，係一場難分高下之戰，要揀邊隊贏可以話係Impossible，因為實力不相伯仲之餘，兩軍各有3大有利元素。

先講巴西，由於近年只踢熱身賽冇分落袋，令佢哋嘅世界排名跌到落22位，創歷史新低，加上國內貧富懸殊引來不少騷動，難得今屆洲際盃殺入決賽，可謂決心十足，希望用獎盃為國民帶來歡樂，以穩民心。其次係主場之利，身處一眾森巴第12人（球迷）嘅壓力下，球證喺一啲50/50嘅判決上，難免會傾向主隊。況且「新比利」尼馬今屆演出脫胎換骨，場場唔係有入波就有助攻，生波死球一樣掂，令之前對佢體能差、欠領導才能嘅質疑一掃而空。

至於連奪世界盃同兩屆歐國盃後，西班牙球員信心已經爆晒棚，呢種長期獲勝所累積嘅王者氣質，就算對住擺出鐵桶陣嘅弱旅，都會好有耐性搵機會。「狂牛」嘅Tiki-Taka踢法，超強控球力獨步天下，令對手連波皮都掂唔到，幾乎立於不敗之地。最後係主帥迪保斯基經驗豐富，可因應球賽變化作出立竿見影嘅調動，好似上仗對意大利時換入拜仁防中查維馬天尼斯，卻讓佢出任中鋒，搞到「藍軍」防線風聲鶴唳。

總括嚟講，從分組賽嘅開放式對攻到淘汰賽嘅小心謹慎，唔同嘅味道令Peter愈講愈過癮，除非決賽早早打破缺口，否則場波會進入膠着狀態，勝負關鍵可能取決於球員失誤、被逐或球證爭議判決等意外因素。