近期球迷嘅視線集中喺洲際國家盃，今晚將上演最後兩場波，重頭戲當然係由巴西及西班牙合演嘅「夢幻決賽」，今場平手盤肥叔稍稍睇好巴西。一路有留意巴西比賽會感覺到，佢哋於今屆洲際國家盃充滿信心，好有決心喺班鄉里面前威番鋪，肥叔認為淨係呢份決心都值得支持，加上球星尼馬弗到漏油，西班牙班後防都咪話唔驚。西班牙方面整體實力係高，不過可能近年太過順風順水，所以踢落有啲「囂」，而佢哋剛啱同意大利惡戰120分鐘，球員搏到殘晒兼比巴西少1日休息，唔多唔少都會影響到發揮，作客環境下想贏更加難。

季軍戰由烏拉圭對意大利，烏拉圭應該高過意大利少少。主要原因係意大利傷兵太多，今場焗住要派好多副選落場。加上意大利一向都對「例行公事」唔多上心，今場輸埋唔出奇。雖然話烏拉圭唔算係乜超級勁旅，但勝在幾個前鋒級數高，要攻破對手大門唔難。另外仲有一點要留意，因雙方球員已經放低晒心理包袱，壓迫性必定降低，對於提升入球數字會有幫助。