洲際國家盃季軍戰將由烏拉圭硬撼意大利，兩軍今屆大踢進攻足球，場場精彩，「烏圭」射手科蘭上仗極刑宴客，谷埋成肚火，撞正防線亂七八糟兼力疲心傷嘅意大利，仲唔趁機打落水狗咩？不過「藍軍」冇晒心理包袱，唔怕同你鬥攻，勢必合演入球騷，入球大有1.8倍值博。

（無綫翡翠台、明珠台及高清翡翠台周一凌晨零時直播）

烏拉圭前鋒三叉戟科蘭、卡雲尼、蘇亞雷斯一向犀利，三個今屆已有進帳，不過科蘭近期腳風唔多順，準決賽對巴西開波冇耐博得12碼，點知佢操刀卻畀前國米隊友施薩索拉斯救出，連後備前鋒艾保靴南迪斯對大溪地之役都省4粒，作為烏拉圭領軍人物，科蘭慘成出局罪人，仲畀主帥泰巴尼斯暗寸冇料到，搞到呢位南非世盃金球獎得主乜嘢面都冇晒，滿腔怒火下誓要搵意大利洩憤。事實上，「烏圭」今屆4仗轟入12球，場場開大火力猛，有一班兄弟幫拖，科蘭唔愁冇入波「餐士」。

意大利領隊柏蘭迪利主張進攻，但同時令脆弱嘅防線暴露人前，之前3場分組賽共失8粒，尤其係中堅邦路斯同基亞連尼均轉身極慢，面對靈活快速嘅科蘭及蘇亞雷斯，非常蝕底。上仗「藍軍」對西班牙力保不失踢出代表作，但惡鬥120分鐘兼射埋12碼惜敗，體力消耗極大，未必回得切氣，加上有中堅巴沙利受傷倦勤，防線更加立亂。

既然今場冇乜競爭性，柏帥隨時作出輪換，讓基奧雲高、迪亞文迪等攻擊球員上陣，烏、意放開懷抱盡情進攻，相信入波唔會少，況且之前兩屆季軍戰均大手交易，與其估邊隊會贏，斯維認為捧大盤更加穩陣。

2009

西班牙和南非2:2

(加時西勝3:2)

2005

德國和墨西哥3:3

(加時墨勝4:3)