南美自由盃四強首回合賽事，巴拉圭球隊奧林比亞會主場對哥倫比亞球會聖達菲。奧林比亞會先後擊敗阿甲堤格雷以及巴甲富明尼斯，晉級過程極具說服力，今仗主場出擊可望撼低聖達菲先拔頭籌，推介主W。

（有線61及201台周三早上8時50分直播）

南美自由盃向來都係巴西及阿根廷球會玩晒，其他南美球隊奪冠次數總和都唔及巴西多，可想而知各地球隊實力差距有幾大，所以奧林比亞會今屆能夠先後擊敗堤格雷及富明尼斯，絕對係實力嘅表現。佢地陣中有兩個球員要特別留意，包括巴拉圭前鋒費迪巴里路以及烏拉圭射手沙基路，呢兩名射手暫時於自由盃射手榜中並列第三，同榜首球員只係差一球，相信二人會繼續拚搏爭取「士哥」。

仲有一點，今屆自由盃分組賽開始，奧林比亞會主場賽事只係打和過一次，其他全部贏晒。既然有咁強勁嘅數據支持，主隊贏波可謂相當正路。對手聖達菲近排賽程頻密，呢場已經係佢哋近一個星期內第三場比賽，咁啱全部都係作客，舟車勞頓下球員根本冇足夠時間休息，表現隨時大走樣，今仗主隊小讓平半好路。