南美自由盃四強首回合有好戲，阿根廷紐維爾舊生主場迎戰巴西明尼路。紐維爾舊生剛失落阿甲總冠軍，球員士氣肯定大受打擊，相反明尼路有部分巴西國家隊主力成員回歸，加上較專注自由盃賽事，今仗作客有力一戰，受讓捧「讓球客勝」。

（有線61及201台周四早上8時50分直播）

紐維爾舊生係今年阿甲秋冠軍，球隊剛於上周六與阿甲春冠軍沙士菲進行總決賽。紐維爾舊生上半場早段雖然先失波，其後喺對手打少個情況下獲得十二碼，可惜射手伊拿斯奧史高高竟然「宴客」，球隊最終輸0比1失落阿甲總冠軍。

紐維爾舊生喺大好情況下最終輸波，整個球季嘅努力付諸流水，士氣難免受損。佢哋相隔數日即匆匆再戰，縱有主場之利亦未必能夠恢復元氣爭勝。

明尼路今季喺巴甲表現平平，暫列倒數第三位，成績跌Watt某程度係因為球隊專注自由盃賽事。事實上佢哋喺自由盃表現不俗，作客只曾喺無關痛癢情況下輸過一次，球隊早前16強及8強嘅作客賽事都可保持不敗，今仗有力延續佳績。

明尼路今仗雖有中堅利華漢拔圖上仗領紅被逐要停賽，但球隊賽前收到好消息，出戰洲際國家盃的巴西冠軍成員班納特安尼斯奧及祖奧等主力經已歸隊，配合猛將如朗拿甸奴及迪亞高泰達利等攻堅，絕對有力對紐維爾舊生後防造成威脅，有得受讓一於捧「讓球客勝」。