日職今日破天荒六台同步直播3場賽事，焦點係積分榜一哥大宮松鼠主場迎戰鳥棲砂岩。蘇豪日前走訪松鼠大本營，終於揭開呢間小球會嘅神秘面紗，星級外援路華高域喺操練時頻頻指點隊友，大軍擁有超強外援班底，以及日職最穩防線，現正進行一場革命，誓要推倒「紅魔鬼」浦和紅鑽，將埼玉縣染橙！

（有線61及201台周六晚6時直播）

蘇豪呢次日職之旅其中一個重要任務，就係睇吓大宮松鼠究竟點解咁叻仔，昨日喺《名家多浪花》專欄分享過佢哋地區工作做得好，獲區內球迷支持，今日同大家講講操練實況。

到訪當日松鼠將士熱身過後即打真軍鬥波，斯洛文尼亞猛將隆比真歷剛傷愈冇操，但佢同鄉路華高域堅搶鏡，憑一人之力就可衝散整條防線，兩大球星今季合共喺聯賽貢獻12球，絕對係日職最強前鋒組合。

松鼠一對斯洛文尼亞外援有料個個都知，相比之下，佢哋班土炮後衞更令蘇豪留下深刻印象。喺隊長菊地光將指揮下，成班兵有紀律有決心，而巴西中場卡連奴斯柏拉巴實而不華，同班本土球員配合好熟。松鼠今季喺聯賽13戰只失9球，數字為日職最低，全靠一眾本土鐵衞撐住防線，佢哋先可以坐穩榜首地位。

浦和紅鑽一直都係埼玉縣一哥，松鼠長年畀同縣大佬騎住，依家終於搵到時機發圍，當然唔會放過呢次黃金「餐士」，但佢哋若想奪冠，休戰過後頭炮對住鳥棲砂岩呢類中下游球隊實不容有失。砂岩將會引入前日本國腳松井大輔，但遠水救唔到近火，加上呢班波出名客場唔掂，估計難敵松鼠。