世青盃8強今晚上演重頭戲，由烏拉圭U20對西班牙U20，「小狂牛」係今屆唯一長勝軍，掛住西班牙呢個金漆招牌，似乎可以秤先。不過隨住巴塞隆拿、西班牙大國腳先後潰敗，Tiki-taka足球已非所向無敵，今仗要讓南美勁旅烏拉圭半一，未免過火。「小烏圭」盛產射手，新星尼高拉斯盧比斯已有4球進帳，有充裕本錢同西班牙鬥攻，捧入球大。（TVB網絡電視01及now 801周日凌晨2時直播）

西班牙今屆4戰4勝，進攻上延續大國腳Tiki-taka踢法，雙箭頭謝斯洛迪古斯及迪路菲奧已合共轟入7球，攻力唔係問題。不過攻力強唔代表贏梗，尤其係巴塞隆拿、西班牙大國腳近期慘敗，顯示只需加強壓迫，就可以瓦解佢哋控球在腳踢法。要對付西班牙，唔可以靠龜縮死守，而係要主動出擊，同佢哋搏錘。

烏拉圭成班球員年紀輕輕，但個人技術優秀，中場組織力又強，絕對有條件同西班牙火併。加上睇完洲際盃巴西大炒西班牙，可能啟發佢哋同對手鬥攻反而有着數。事實上，西班牙防守麻麻，今屆4戰僅1場冇失波，面對火力強勁嘅烏拉圭，難保持清白之身。

另一場8強法國U20對烏茲別克U20，法國身為奪標次熱門，陣中有祖雲達斯中場保羅普巴及剛加盟阿仙奴嘅耶耶辛洛高，實力高對手兩班。烏茲別克仲要有後防主力耶達舒奧夫、拉卡文洛夫停賽，隨時大敗，捧法國「讓球主勝」。

（TVB網絡電視01及now 801周六晚11時直播）