神秘UFO獲亨利力撐
美洲金盃明日清晨於美國開打，法屬島國馬提尼克將成為今屆其中一支「不明足球物體」（Unidentified Football Object），唔少球迷都視佢哋係中北美洲版嘅大溪地，冇人對佢哋有期望。但唔講你未必知，馬提尼克近年為宗主國法國出產唔少頂級射手，其中傳奇人物亨利嘅媽咪正係嚟自馬提尼克，而佢亦高調表明會力撐呢個第二故鄉，加上有射得之人比基安尼壓陣，於A組揭幕戰挑戰加拿大有力爆冷，可博「讓球客勝」！
(有線61及201台周一清晨5時30分直播)
法國兵工廠 盛產射手
大溪地早前喺洲際國家盃以「快樂足球」贏盡球迷心，同樣係法屬島國嘅馬提尼克又點呢？查實佢哋本身係法國兵工廠，為國家隊輸出唔少出色前鋒，安歷卡、亨利同雷米都有馬提尼克血統。除咗上述幾位球星外，今夏離開巴塞隆拿嘅法國左閘艾比度都係「原產」於馬提尼克，足見呢個地方確係有出產好球員嘅DNA。
亨利爸爸嘅祖家瓜德羅普曾於金盃製造唔少冷門賽果，今屆輪到佢媽媽祖家馬提尼克出場，佢話會力撐球隊：「我真係好好彩，之前支持瓜德羅普，今屆當然會捧阿媽祖家場啦！」亨利話：「馬提尼克嘅好球員都會揀為法國國家隊効力，但佢哋一樣能打入金盃，我希望佢哋好好表現自己，成為我哋嘅驕傲！」亨利其實都有機會出戰金盃，根據賽會條例，佢若於過去5年冇代表法國就可為馬提尼克或瓜德羅普効力，但現時距離亨利最後一次代表法國仲差兩年，亨利話兩年後都未知仲踢唔踢到波，就算踢得都唔知揀邊隊。
比基安尼掛帥 受讓有計
馬提尼克搵唔到亨利幫手，但仲有韋斯咸及里昂舊將比基安尼助陣，呢位前鋒年屆34歲，但仍衝得撞得，拍住首席射手巴斯曼甚具威力，佢哋仲召入喺西班牙搵食嘅守將巴賓及佳哥利阿路連，論人腳絕對唔曳，早前於熱身賽就砌低過波特蘭伐木者U23，陣內球員普遍波底好，實力不容忽視。
對手加拿大剛任命前皇馬教頭科路為帥，但佢於金盃後先上任，大軍現時處於重整期，人腳同戰鬥力都係一般，對住呢支UFO隨時中伏，讓波靠唔住。
墨西哥衞冕 搵巴拿馬祭旗
同日另一場A組賽事，由墨西哥出戰巴拿馬，墨西哥喺金盃戰績彪炳，更加係對上兩屆冠軍，不過近期戰績麻麻，主帥荷西托尼備受壓力，故今次起用一班倫敦奧运金牌小將，誓要爭盃挽頹勢，何況巴拿馬係佢哋嘅私房菜，衞冕首擊實食冇黐牙，主W冇甩拖。
（有線61及201台周一早上8時直播）
