假土耳其舉的世青盃今晚續演兩場半準決賽，頭場兩支亞洲隊伊拉克Ｕ20及南韓Ｕ20內訌，伊拉克球員雖然冇星味，不過踢法機動夠效率，南韓整體表現唔突出，攻不銳防守亦多漏洞，平手盤波童揀伊拉克。

（TVB網絡電視01及now 801周日晚11時直播）

今屆世青盃歷史性有3支亞洲隊殺入8強，當中以伊拉克演出最討好，佢哋首場分組賽於落後兩球劣勢下逼和英格蘭，然後接連擊敗埃及、智利殺入16強，連同上仗加時淘汰巴拉圭，4場比賽於法定時間內保持不敗。多名主力好似前鋒阿布度拉謙、中場泰列基及沙爾夫沙文、後衞阿里阿丹及迪靴咸伊斯美都已入選大國腳，實力有保證。雖然射手阿布度拉謙因累積黃牌夠數今仗要停賽，但上仗後備入替建奇功嘅法漢沙哥同樣具質素，對以打整體戰為主嘅伊拉克影響應不大。

南韓上仗跟哥倫比亞激戰一百二十分鐘，最後憑互射十二碼淘汰對手，晉級帶點运氣，事實上佢哋上場領先之後一直被哥倫比亞住嚟砌，如非對手腳頭無靈，南韓未必可以頂到互射十二碼。

南韓今屆四場比賽都有失波，當中有三次先失守，就算唯一勝仗對古巴都贏得冇乜說服力，面對愈踢愈有信心嘅伊拉克冇優勢，平手盤捧伊拉克，「讓球主客和」南韓讓一球，亦可敲伊拉克「讓球主勝」。

另一場加納Ｕ20對智利Ｕ20，加納分組賽不敵兩大熱門西班牙、法國情有可原，之後兩場擊敗美國、葡萄牙入七球已經返晒嚟，智利中前場主力安祖路軒歷基斯、拿貝路及尼高拉斯卡斯迪路都有破關之力，捧大盤啱數。

（TVB網絡電視01及now 801周一凌晨2時直播）