南美自由盃4強今早展開次回合，哥倫比亞球隊聖達菲主場對巴拉圭球隊奧林比亞會，聖達菲首回合輸0比2，返到自己地頭焗攻求收復失地，奈何呢班波守強攻弱，要佢哋採取主攻，恐怕只會無所適從。奧林比亞會去到高原地區比賽，應會主守歎慢板保留體力，Mic少建議要1.9倍入球細。

（有線62及202台周三早上8時50分直播）

聖達菲呢隊波一向擅長穩守突擊，16強同8強都成功偷襲得手，先取得作客入球，然後再利用高原主場優勢磨死對手。不過呢招嚟到4強終於遇到阻滯，首回合佢哋淨吞兩蛋，係球隊今屆最大敗仗，加上攞唔到作客入球，形勢所逼下，今仗需要改變戰術壓前搶攻。

不過主攻並非聖達菲所長，睇番佢哋今屆自由盃5場主場，多數煲魚生粥，仲要全部開細。同埋以呢支哥倫比亞球隊近三仗不勝頹勢，恐怕想谷亦谷唔起，主Ｗ1.35倍高風險、低回報，唔多值博。

至於對手奧林比亞會有兩球喺手，今仗肯定會睇定慢慢踢，尤其係去到海拔二千六百多米高原地區比賽，空氣稀薄體力消耗較快，如果和主隊對攻同自殺無分別。奧林比亞會自然明白呢個道理，最好使用拉布戰術，減慢體力消耗，力保上場勝果到尾，今場波預料入波唔會多，細盤係不二之選。