日職重開後馬上展開快車期，「二哥」浦和紅鑽主場迎戰FC東京，蘇豪日本之行有去到紅鑽大本營，喺教頭柏度域帶領下，大軍練波氣氛好好，佢哋上場殺敗甲府風林極具王者之風，今次對東京有力再下一城，捧主勝！

（有線61及201台周三晚6時30分直播）

蘇豪現場督操當日，紅鑽將士表現充滿信心，守將槙野智章特別搶鏡，出國後重返日職更有星味。箭頭原口元氣就被主帥柏度域安排辣操，相信會逐步上力。大軍喺聯賽盃殺入四強後，上場聯賽力戰甲府風林，搏到尾段仍然搶攻，鬥心好勁。

另一邊廂，FC東京嘅星級前鋒李忠成最近已經離隊，首席射手渡邊千真有傷，今戰未必踢得，上場佢哋由盧卡斯施維連奴打單箭頭，效果都係麻麻，隊內後備前鋒平山相太踢得少，信心同狀態都不足。東京今戰仲有守將加賀健一坐波監，攻守力都受削，結合球隊近六次作客浦和紅鑽輸五場，相信都係冇运行！

同日橫濱水手作客大阪櫻花，水手三老中澤佑二、中村俊輔與馬昆奴斯今季呈迴光之勇，成為球隊站穩前列關鍵人物。不過佢哋喺聯賽盃連搏兩場後，上場於聯賽主場鬥弱旅大分三神走晒樣，老將不利連拚，今次作客讓波唔抵玩，撐大阪櫻花「讓球主勝」！