周五早上美洲金盃上演A組第二輪分組賽，頭場巴拿馬鬥馬提尼克，雙方首戰均在被一致睇淡下全取三分，足證彼此有一定實力，今輪兩軍互撼屬五五之爭，巴拿馬讓唔起對手，波童捧「讓球客勝」。

（有線61及201台周五早上8時30分直播）

兩軍首戰贏波目前三分在手，相比巴拿馬擊敗以二線兵出戰嘅墨西哥，馬提尼克擊敗加拿大似乎更有冷味，不過睇番比賽過程，馬提尼克唔係一味死守，曾經踢過英超嘅靈魂人物比基安尼好有級數，多次喺前線穿針引線，如果前鋒把握力好啲，早已經置加拿大於死地，證明佢哋並非完全冇還擊之力。巴拿馬能在墨西哥身上全取三分當然亦值得一讚，不過巴拿馬始終唔係一支擅攻球隊，今場要讓波自然唔同講法，寧捧馬提尼克一鼓作氣可以保持不敗。

尾場兩支哀兵墨西哥、加拿大碰頭，兩軍首仗同告輸波，為保出線希望不容再失。加拿大上場對住馬提尼克防線慌失失，以呢支「墨西哥二隊」質素相信仍游刃有餘，捧「讓球主勝」。

（有線61及201台周五早上11時直播）

至於身處C組嘅東道主美國尋日朝早首度出擊，佢哋今屆派出二隊，但對住弱旅伯利茲綽綽有餘，射手雲度路斯基上半場連中三元，表現搶鏡，另一星級前鋒當路雲尾段都有士哥，協助球隊大勝6比1，現於足智彩成為2.15倍奪標大熱。同日實力分子哥斯達黎加以3比0輕取古巴，極有機會同美國攜手出線。