美洲金盃明早上演B組第二輪賽事，頭場千里達迎戰海地。海地屬於「快樂足球」派系，有前冇後威脅有限之餘，更暴露後防大量空間，令對手有機可乘。千里達射手堅韋尼鍾斯級數超班，以海地鬆散防線，啱晒佢胃口，小讓平半Mic少力捧上盤。

（有線61及201台周六早上7時直播）

同樣叫「阿地」，海地甚有大溪地影子，喜歡踢進攻足球，雖然海地曾於上月熱身賽逼和意大利而人氣急升，但一踢正式賽事即現形，首場分組賽吞洪都拉斯兩蛋。海地最大問題係冇自知之明，質素不及對手情況下仍然主攻，有前冇後打死罷就。呢種精神雖然值得欣賞，但可惜欠缺實際，海地上仗射門多達17次，比對手多11次，但最終輸0比2就係最佳例子。睇番海地今年賽事，失球數字持續高企，即使鬥阿曼、多美尼加共和國等弱隊都失三球，後防中門大開，睇見都牙煙。

千里達首仗雖然僅逼和薩爾瓦多2比2，但表現對辦，尤其係効力英超史篤城嘅堅韋尼鍾斯，演出甚為搶眼，呢位高大前鋒步大力雄，正好剋死身材偏矮嘅海地球員，值得睇高一線。另一場洪都拉斯對薩爾瓦多，洪軍踢法穩陣，而且已有3分在手，今仗更加唔會冒進，一旦加強防守，薩爾瓦多咬佢哋唔入，一於捧入球細。

（有線61及201台周六早上9時30分直播）