「紅魔鬼」新帥莫耶斯喺泰國首次領軍出擊，將與泰國明星隊交手，曼聯首站鬧前鋒荒，前線僅餘韋碧克一個正宗射手，加上舟車勞頓後需時調整，hea踢機會高。泰軍實力有限，但求輸得冇咁難睇，將會傾力死守，預期今戰士哥唔多，細盤屬投注首選！

（now 632周六晚9時直播）

睇番曼聯泰國站大軍名單，尹佩斯同查維亞靴南迪斯不在陣中，本來由朗尼同韋碧克撐起鋒線，隨住前者受傷返英，家陣得番韋碧克攻堅，呢位哥仔雖然勤力，但出名低產，咪對佢抱有太大期望。莫耶斯今次冇帶熱身賽之星馬捷達，另有拿尼、艾舒利楊格同路爾斯華倫西亞缺陣，中前場唔齊腳，超新星贊奴薩極具潛力，但始終欠缺經驗，暫未能擔大旗。 

「紅魔鬼」新帥莫耶斯取代費格遜首度領軍，當然想打響頭炮，不過陣內一眾球星啱啱復操仲未夠弗，如谷得太盡可能再添傷兵。加上大軍需時適應亞洲天氣及環境，戰鬥力減半，只靠級數搭夠，今戰料仍能控制戰局，但好大機會歎慢板，志在寓賽於操，大勝機會唔高，讓得多唔抵玩。

泰國明星隊缺少當紅球隊武里南聯球員，只能倚重幾個蒙通聯主力，當中以泰國星級射手鄧達最有分量，呢位射手喺國內賽事也文也武，但想威脅里奧費迪南、菲爾鍾斯同莊尼伊雲斯等似乎未夠班，泰軍明知技不如人，相信會死守，一於輸少當贏，故玩細盤之餘，可博埋「和客」。