阿仙奴新季第1擊將會作客印尼明星隊，揭開今夏嘅亞洲掘金之旅，雖有辛迪卡索拉等主力冇隨隊，但叉足電嘅普多斯基、基奧特、禾確特猶如猛虎出柙，加埋一班小將都想趁機博上位，面對拉雜成軍嘅印尼明星隊夠殺有餘，相信可大勝一場響頭炮，「讓球客勝」捧得過。

（亞視本港台周日晚9時30分直播）

今次出戰印尼明星隊，係阿仙奴開操後首場熱身賽，睇番兵工廠嘅大軍名單，雖有隊長華美倫及謝雲奴因傷病缺陣，辛迪卡索拉同蒙利爾踢完洲際盃冇耐未歸隊，但陣容依然鼎盛，單係中前場，就有普多斯基、基奧特、禾確特、韋舒亞、艾朗藍斯、阿歷士張伯倫等助陣，大舊中鋒基奧特喺禁區衝得撞得，禾確特爆發力驚人，只要稍為認真啲，以咁強勁嘅進攻火力，足以搞到印尼明星隊防線天翻地覆。

除一眾主力外，阿仙奴主帥雲格一向愛用年輕球員，今次亦有一批小將隨隊出征，例如恩格斯美基爾、宮市亮、達米安馬天尼斯、伊斯菲特等，以往冇乜點為阿軍披甲，宮市亮上季更被外借到韋根添！難得今次熱身賽有上陣機會，仲唔喺雲帥面前爭取表現咩？因此佢一定毫無保留搏到盡。

印尼明星隊質素平庸，最出名嘅係曾踢過澳職阿德萊德聯嘅射手沙治奧雲迪克，但此子水準已走晒下坡，其餘都係烏合之眾，好難威脅到阿仙奴嘅防線，預計火力強大嘅兵工廠可予取予攜，「讓球客勝」不容錯過。

門將：施捷斯尼、法比安斯基、達米安馬天尼斯

後防：基蘭基比斯、贊堅臣、哥斯尼、沙格拿、恩格斯美基爾、梅迪薩卡

中場：阿迪達、宮市亮、路斯基、阿歷士張伯倫、艾朗藍斯、韋舒亞、捷拿比、伊斯菲特、艾蘭克、基斯奧臣、施拉林

前鋒：基奧特、普多斯基、禾確特、艾克邦

7月14日：作客 Vs 印尼明星隊

7月17日：作客 Vs 越南

7月22日：作客 Vs 名古屋鯨魚

7月26日：作客 Vs 浦和紅鑽