雖然今日得五場波，不過阿King亦搵到好嘢，咪就係正氣到暈嘅美國隊，佢哋會喺 朝嘅美洲金盃C組尾輪迎戰哥斯達黎加。「花旗兵」近期表現脫胎換骨，獲重召嘅前鋒當路雲亦大踢爭氣波，劍指冠軍，必定食住個勢有力贏埋，阿King強捧主勝。

（有線61及201台周三早上8時直播）

其實由德國名帥奇連士文接手後，美國有段時間表現起伏不定，不過奇哥最醒係激勵球員，自六月頭熱身賽爆冷4比3擊敗德國，成隊「花旗兵」忽然開晒竅咁，精神面貌完全唔同晒，連場報捷信心返晒嚟。作為東道主，美國梗係想捧走美洲金盃喇，今次奇哥重召前鋒老大哥當路雲，佢同聖荷西地震箭頭雲度路斯基係咁入波，火力唔講得笑，兩場贏晒弗到爆。哥斯達黎加上仗對住弱旅伯利茲苦戰之下贏得一粒，演出唔多對辦，況且手握六分已經出線，唔會同「花旗兵」硬碰硬，主勝有計。

至於歐聯第二圈外圍賽首回合，捷克勁旅柏辛域陀尼亞主場火併波斯尼亞球隊薛謝斯歷卡，柏軍近年經常參加歐洲賽，經驗豐富之餘，實力超過薛謝斯歷卡幾條街喇，為「錢」途主場出擊唔會留手。另一場歐聯外圍賽，白俄班霸巴迪依家喺聯賽打得如火如荼，狀態唔使懷疑，上屆該隊不但殺入歐聯分組賽，更有主場勇挫拜仁嘅佳績，今晚對哈薩克球隊卡拉簡迪，喺主場可以予取予攜，不妨直取「讓球主勝」。