日本剛公布東亞盃大軍名單，教頭沙哲朗尼清一色揀晒國內搵食球員，志在為國家隊注入新戰力。浦和紅鑽今次有三人入選，射手原口元氣被寄予厚望，但紅鑽於聯賽重開後愈踢愈沉，今輪主場出戰都讓唔起橫濱水手，蘇豪要「讓球客勝」！

（有線61及201台周三晚6時直播）

蘇豪上月尾去到浦和紅鑽大本營訪問原口元氣，當時呢個年輕射手已經話好恨入選國家隊，話咁快佢就獲得徵召，仲聯同紅鑽守將森協良太及槙野智章齊齊出戰東亞盃。日本前線欠缺大將，今次係原口元氣上位好機會，與此同時，日軍防線於洲際國家盃表現不穩，槙野智章及森協良太亦有機會爭位。

紅鑽三子踢埋今場會去日本大軍報到，佢哋為國家隊前途搏命前，先要幫球會走出低潮。自聯賽重開後，紅鑽表現未如理想，主要係防線出現問題，前仗對FC東京失兩球響起警號，上場作客川崎前鋒惡化淨吞四蛋。紅鑽今次若於主場急於求勝，實會好似上場咁暴露防線弱點，但齋守亦唔係辦法，進退失據好惡搞。

橫濱水手亦有守將粟原勇藏及年輕箭頭齋藤學入選日本東亞盃大軍，後者今季發揮平穩，上場又取得士哥。近期日職開快車，水手陣中老將多，呢點對佢哋好不利，不過老牌射手馬昆奴斯真係有卡士，雖然走動唔多，但把握力強，對上兩場都有士哥，結合球隊近六次作客紅鑽全勝佳績，「讓球客勝」值得一試。