美洲金盃8強重頭戲形勢微妙，主辦國美國要「作客」薩爾瓦多！今場金盃8強戰於巴爾的摩舉行，當地住有13.5萬薩爾瓦多移民，入場擁躉肯定以「薩粉」較多。以波論波美國較強，攻力有晒保證；但薩軍有強大後援亦必打高兩班波，捧大最好！

（有線61及64台周一凌晨4時直播）

所謂主場，即係自己地頭，通常球員熟知場地特性，亦適應天氣，但如果入場者以敵方球迷較多，「主場威力」就肯定打折扣。美國憑地利於分組賽順風順水，3連勝威過威士忌，前鋒雲度路斯基已有5球進帳領先射手榜，實力老將當路雲亦踢得好生，美國被封為2倍頂頭捧盃大熱合情合理。

不過今仗情況有啲特別，根據當地傳媒報道，呢場8強大戰入場者絕大部分係當地薩國移民，今戰「他鄉遇故知」必起勢打氣，薩爾瓦多戰鬥力隨時激增，唔赦主隊。雖然球隊未有派最強人腳參賽，但射手施拿耶狀態大勇，至今已省入3粒，預計會同美國「做大騷」，入球大1.65倍抵玩。今仗若法定時間賽和將加時30分鐘，再和就互射12碼分勝負。