東亞盃男足爆發矚目中日大戰，日本於南韓決戰中國，日軍今次派出全日職人腳出戰，試陣味極濃。中國足球經歷「615災難」後，名帥甘馬曹落鑊掛冠而去，今次大軍以廣州恒大七子作重心，全力為尊嚴而戰，論決心更勝日本，中國受讓之下，蘇豪一於要「讓球客勝」。

（now 633及635周日晚8時直播）

日本於洲際國家盃失利，教頭沙哲朗尼喺今次東亞盃揀晒清一色日職兵，外流主將如香川真司及本田圭佑統統冇入選。沙帥今次志在發掘新戰力，柿谷曜一朗、原口元氣及豐田陽平等箭頭都屬重點觀察對象，為咗爭取成為明年世界盃大軍一員，呢班二線兵都會搏命，但最大問題係佢哋一直冇夾開，默契點都差啲，即使個人技術較佳，但落到場都要磨合，所以實際優勢並唔係好大。

中國喺今年6月15日主場1比5大敗畀泰國，度過中國足球史黑暗一日，教頭甘馬曹難逃下台厄运。大軍現時由U22教頭傅博擔任看守教練，今次召入七個廣州恒大球員，老大哥鄭智及守將張琳芃將成中後場重心，小將武磊勢成秘密武器。球隊賽前仲特別集體觀看巴塞隆拿嘅比賽錄影帶，從中偷師，戰意十足。

雖然國足上次贏日本已經係15年前，但佢哋上屆踢分組賽對日本都唔使輸，今次決心更大，預期可以保持不敗，1.75倍「讓球客勝」博得過。