「寸王」莫連奴冇諗過撻着turbo，又會做「hea車」！車路士亞洲之旅第2擊作客馬來西亞明星隊，莫帥講明唔會因為熱身賽，而令到球員有任何損傷，大家唔使旨意車仔會狂攻大勝取悅球迷。預料今仗上半場戰情膠着，捧「半場細」。（亞視本港台周日晚9時45分直播）

莫連奴一向目標為本，而且充滿自信，今次重返車仔，佢唔需要急於證明自己，故現階段就算球隊冇表現，佢亦唔會擺喺心。莫帥深知此等熱身賽勝負無關痛癢，所以上仗開波前林柏特受傷，佢就即時收起佢，賽後更講明唔會咁戇居為友誼波冒險，要一眾大將於質素較曳嘅場地上去盡。故上仗鬥泰國明星隊，車仔班大帝懶懶閒，全場行行企企僅入1粒，就完全可以理解。今次鬥「馬國明」，戰情會大同小異。

睇番上仗，車仔新兵小將如舒賀爾尼等完全未上力，90分鐘搓搓搓等完場，拿仁打死唔信呢場會搏老命。前鋒盧卡古係最落力嗰個，但狀態未起好難對佢寄予厚望。

阿仙奴同曼城去年都鬥過「馬國明」，前者贏2比1，後者勝3比1，兩次半場都係得1球交收。雖然陣容有出入，但亦證明馬來西亞明星隊唔係曳到爆，上半場好氣好力下，力足同車仔呢支「旅遊大軍」一拚，捧2.35倍「半場細」。