今晚熱身賽唔多，荷蘭勁旅燕豪芬（PSV）作客葡超球隊科英布拉大學，上季PSV在庸帥艾禾卡特執教下有頭威冇尾陣，接連失落聯賽及荷蘭盃，未能為PSV創會100周年以獎盃贈興。新季球隊扶正助教高古代替艾帥，呢位前荷蘭國腳決定大刀闊斧，先後放走前鋒殺手梅頓斯及謝明蘭斯，大力提拔青訓新人，之前四場熱身賽三勝一和，成班波朝氣勃勃，對住實力平平嘅科英布拉大學，PSV食住個勢可再下一城。

法甲暴發戶摩納哥今夏斥巨資買人，先後羅致法卡奧、占士洛迪古斯、摩天奴、杜拿蘭等猛將，但踢落唔多似樣喎，前晚該隊作客以0比1不敵德甲弱旅奧格斯堡，熱身賽連輸兩場曳到爆，但主帥雲尼亞里暗示仲想增援，小心球季未開鑼就畀老闆魯博洛夫列夫開刀。