今晚阿仙奴展開亞洲之旅第四擊，續於日本出戰浦和紅鑽，兵工廠堪稱熱身賽之王，近三場怒轟十七粒，殺聲震天，其中箭頭基奧特包辦六球，呢位法國大兵衝得撞得，恰死較矮細嘅亞洲後衞，加上紅鑽陷於低潮，防線穿晒大窿，難頂一眾「廠兵」來襲，「讓球客勝」捧得過。

　　(亞視本港台周五晚6時30分直播)

　　雖然今夏冇乜增兵，但變相阿仙奴唔使面對磨合問題，只要操起狀態便一撻即着，喺亞洲之旅頭三場入十七球，比起其他出征亞洲嘅英超球隊，阿仙奴嘅氣勢贏晒。

　　浦和紅鑽防線穿窿

　　特別係基奧特弗到爆燈，首仗後備入場後三分鐘梅開二度，次仗半場大演帽子戲法，上仗對鯨魚又用頭槌打破僵局，腳風順到冇朋友，呢位高大中鋒頂上功夫一流，要撞散身形較矮嘅亞洲守將話都冇咁易喇。

　　咁蹺紅鑽防線大穿窿，近三聯賽失九球，相信基奧特等「廠將」可趁火打劫，「讓球客勝」咪錯過。