近十年來嘅巴克萊亞洲锦標賽，Peter有幸同著名評述員Martin Tyler短聚四次，Tyler每次私人時間都好短，因此大家唔係經常見面，雖然彼此分屬老友兼同行，但佢嘅專業態度令人敬佩，係名副其實嘅殿堂級講波佬。不過，大家做人座右銘卻心靈相通，就係熱情、勤奮、知足及謙虛。

　　費Sir急流勇退夠明智

　　談到我哋心目中近代英超最佳主帥之一費格遜時，Tyler喺呢位前紅魔主帥宣布退休前三日，曾經喺草坪見到佢，但費Sir完全冇透露過收山嘅口風，不過Tyler都認為其急流勇退實屬明智決定。對於曼聯王牌朗尼嘅轉會風波，Tyler覺得關鍵在於主帥莫耶斯嘅態度，假如真的賣畀爭標勁敵車路士，只會坐大對手不太划算。至於來港後與熱刺貌合神離嘅加里夫巴利，Tyler稱若今晚(昨晚)對南華之役呢位威爾斯球星依然缺陣，相信離隊機會高唱入雲。

　　講波佬把聲好緊要，Peter一向會預備一杯齋啡加半杯熱滾水，此乃開聲靈丹，但Tyler大爆阿仙奴領隊雲格亦好此道，估唔到與「教授」有同一習慣，令Peter驚喜萬分。

　　金句：高人唔需要別人崇拜 老友係唔使日日見的