今晚重點可留意挪超賽事，前列之戰白蘭恩主場對洛辛堡。榜首洛辛堡剛於歐霸盃出局，似有「棄盃保聯」意圖，呢支挪威老牌球隊連續兩季失落聯賽锦標之後，今季對冠軍志在必得，話佢哋放棄盃賽，專注爭聯賽，絕非冇道理。今仗作客勁敵白蘭恩，更加不容有失，平手盤要洛辛堡。

　　(周一凌晨零時開賽)

　　洛辛堡一向視聯賽锦標為囊中物，但連續兩季畀莫迪搶走冠軍，可謂名譽掃地，今季該隊重拾王者風範，但只領先次席史卓加斯特兩分，優勢唔明顯。因此傳出洛辛堡故意放棄歐霸盃，專心打聯賽。事實上，以洛辛堡嘅級數竟然喺歐霸盃被蘇超球隊聖莊士東淘汰，的確有「冷味」。既然已成定局，洛辛堡惟有疊埋心水喺聯賽搏殺。

　　白蘭恩狀態奇差

　　白蘭恩雖然位居前列，但狀態處於低谷，近兩仗失分畀下游弱隊漢福斯及史達，尤其係畀包尾嘅史達攻入三球，後防演出更係慘不忍睹，試問又點抵擋得住洛辛堡來犯。另一場挪超奧特格寧蘭主場對特林素，主隊踢法進取，上仗作客洛辛堡都照攻，而且佢哋以往鬥特林素，經常大手交易，屬於開大格局。