失落德超盃 哥帥受壓急補鑊

　　奧迪盃首日壓軸戲由東道主拜仁慕尼黑迎戰巴甲聖保羅，拜仁喺德國超級盃失利後谷埋一肚火，矢志要喺奧迪盃攞彩，今仗勢必精銳盡出，上仗缺陣嘅列貝利同丹迪可以復出，馬里奧葛斯亦有望上陣，遇上近期忙於護級而攰爆嘅聖保羅屬大炒格，黑柴強捧拜仁「讓球主勝」。

　　(有線61及201台周四凌晨2時30分直播)

　　拜仁今屆搵嚟名帥哥迪奧拿執教，不過因為上屆嘅完美成績，令哥帥飽受壓力，尤其啱啱喺德超盃慘敗於死敵多蒙特腳下，德國傳媒已經急不及待開始炮轟哥帥，話佢用人唯親，重用親信堤亞高艾簡達拿，將新當選德國足球先生舒韋恩史迪加投閒置散，加上前主帥軒歷基斯又以超高票當選上屆德甲最佳教練，等於再摑哥帥一巴。哥帥未來每場波都要面對更高期望，今晚主場面對遠道而來嘅疲兵聖保羅，係重新立威嘅良機。

　　聖保羅當然係世界頂級球會，曾6捧巴甲、3奪自由盃，又贏過世冠盃，但佢哋近年實力嚴重下滑，尤其今季更加長陷低谷，自6月至今9場巴甲未贏過，當中輸咗6場，目前已跌到尾3，搞到要護級，真係羞家。

　　聖保羅兵疲唔夠揪

　　巴西極度頻密嘅賽程令佢哋抖唔到氣，連同南美超級盃，佢哋由月中起至今已經踢咗5場，平均每3日踢1場，結果1和4負，近4場更冇波入，狀態曳爆，今次遠道而來，陣中較為人關注嘅只係前天才甘素及前阿仙奴球員丹尼遜兩位中場球員，以及年屆40嘅傳奇門將羅渣里奧。另一巨星副隊長盧斯奧因為紀律理由被罰停賽，今次冇隨隊倒戈舊主，呢支疲兵今次擺明踢交差波，戰意遠遜拜仁，難逃被大炒厄运。