拜仁入波功臣怒睥哥帥

　　拜仁慕尼黑贏波但爆內訌?呢支上屆德甲兼歐聯盟主前晚奧迪盃4強喺主場以2比0擊敗聖保羅，但入波功臣文迪蘇傑為球隊打開紀錄後竟然冇慶祝，仲怒視教練哥迪奧拿。有傳呢位克羅地亞前鋒不滿哥帥頻頻用無鋒陣，令佢失去正選，包括今仗亦要屈居後備。拜仁上半場16次射門都入唔到波，要換入文迪蘇傑先至由佢打破僵局，難怪向哥帥做出「示威」行為，睇嚟哥帥要諗計點安撫班球員喇。

　　另外，比賽出現兩位門將直接交鋒一幕，比賽末段聖保羅博到12碼，但職業生涯累積超過100個入球嘅「射手門將」羅渣里奧主射被拜仁門將紐亞救出。

　　至於另一場4強，曼城同AC米蘭上半場已經踢成5比3，合共入8球，爆出足智彩800倍半場主其他波膽，當中迪斯高梅開二度，但下半場兩隊冇交收，最後曼城維持贏5比3。