假美國舉行的國際冠軍盃4強戰，皇馬、愛華頓將合演入球騷!皇馬新帥安察洛堤超認真，剛鬥洛杉磯銀河派C朗、賓施馬等主力落場，攻勢水銀瀉地轟入3粒，今場唔會畀佢停;「拖肥糖」新帥馬天尼斯亦崇尚攻擊足球，熱身賽守嚟無謂，大細中位數3.5球照捧大盤!

　　(now 632及621周日早上8時直播)

　　經過一個失敗球季後，皇馬本季銳意發憤，正所謂新官上任三把火，肥安上場後必想攞個頭威，呢次國際冠軍盃唔會有任何保留。此等熱身賽周時爆冷，但皇馬勝在夠弗，面對銀河亦出真功夫，其中C朗「一扭三」入波盡顯功架，睇到呢位葡萄牙巨星已經上力，加上賓施馬梅開二度腳風順，「銀河艦隊」勒都勒唔住，呢場喺美國洛杉磯上演嘅4強戰，會繼續全攻型殺敵。

　　愛華頓轉型玩對攻

　　以往於莫耶斯時代，愛華頓一向四平八穩，永遠先做好防守先伺機突擊，不過依家馬天尼斯揸旗，「拖肥糖」肯定會轉型。以往教韋根，雖然班波實力麻麻，但球隊一樣照攻可也;到上仗對祖雲達斯，馬天尼斯盡出費蘭尼、米拿拉斯、派拿、安尼捷比攻堅，同「斑馬兵團」對攻，最後打成各一平手並射贏12碼過關，班波個form咁好，加上此等熱身賽勝負無關痛癢，愛華頓轉踢防守足球機會唔大，呢個形勢捧大好路。