QPR雷丁韋根龍游浅水

　　話咁快2013至14年英冠聯賽又開鑼，三支「降班球隊」昆士柏流浪(QPR)、雷丁同韋根由於大部分主力留隊，於英冠自然成為勁旅，其中QPR由老帥夏利列納帶領下，誓搶直接升班席位;韋根購入前鋒格連荷特夠殺;雷丁亦有德倫特加盟，三軍新季龍游浅水，勢成風頭躉!

　　雖有夏利叔季中帶隊，但QPR上季始終未能護級成功，如今要逐鹿英冠，又點會唔超班?到截稿一刻，大將如泰拉拔、凱列特等仲未離隊，只要夏利叔可以執番好紀律，球隊打出應有水準，相信可以坐亞望冠。

　　屈福特射手他投

　　韋根有領隊馬天尼斯走人，仲帶埋干尼轉投愛華頓，不過卡林麥馬拿文、馬隆尼、包爾斯亞仲在陣中，再加上購入諾域治射手格連荷特，球隊攻力爆燈，加上新領隊奧雲高尼對英冠非常熟悉，相信戰鬥力可以保持。雷丁最大武器，肯定係領隊艾堅斯，呢名前修咸頓主帥好有料，上季尾佢得太少時間，未能帶領雷丁留級;但經過磨合期後，雷丁肯定可以成為英冠實力分子。

　　至於屈福特，上季佢哋一鳴驚人，但本季蜜月期已過，領隊蘇拿或不再神奇，加上靈魂前鋒馬迪維達已經離隊，唔好對「蜜蜂兵團」抱太大期望。布力般流浪有神射手佐敦洛迪斯助陣，只要拍檔貝斯重拾狀態並發揮威力，戰鬥力不容小覷，不過球隊受太多場外因素，如財政問題等影響，相信表現會較飄忽。

　　三支升班球隊唐卡士打、般尼茅夫同伊奧維方面，其中以般尼茅夫較具戰鬥力，領隊艾迪侯域或有力帶領球隊護級;另外兩軍兵微將寡，相信都係做升降機。