日職上季盟主廣島三箭季初因要兼顧亞冠盃影響聯賽成績，但自從喺亞冠盃出局，球隊近九場聯賽八勝一和，三扒兩撥已經上反榜首。浦和紅鑽一向作客發揮好過主場，近兩場主場聯聯鬥前列嘅橫濱水手、FC東京都贏唔到，廣島三箭受讓值得捧場。

　　(有線61及201台周六下午5時直播)

　　荷甲勁旅燕豪芬首輪作客鬥海牙，客軍下周需要應付歐聯外圍賽次回合，作客讓唔起球半。(now 670周日凌晨零時45分直播)此外，蘇超些路迪及瑞典超艾夫斯堡同樣有歐聯後顧，今周都要捧對家。自從蘇超冇咗格拉斯哥流浪之後，些路迪於本土難尋敵手，喺歐洲賽搵真銀先係佢哋最大目標，今場讓羅斯郡球半、兩球捧下盤。艾夫斯堡對上兩次出戰歐聯前於聯賽都贏唔到，今周作客鬥AIK蘇納信唔過，捧主W。